ހުޅުމާލޭ ރެހެންދި ޓާފް ދަނޑު ކައިރީ މީހަކަށް ހަމަލާދީ ޒަހަމްކޮށްލުމަށް ފަހު، ފިލަން މާލެ ދަނިކޮށް ހައްޔަރު ދެވަނަ މީހާ ވެސް ޝަރީއަތް ނިމެންދެން ބަންދުކޮށްފި އެވެ.
އެ މައްސަލާގައި ފުލުހުން ހައްޔަރުކުރީ ގދ. ފިޔޯރީ ހީނާމާގޭ، ރުސްތުމް އިބްރާހިމް، 25 އާއި ބ. ގޮއިދޫ، ފިނިފެންމާގޭ، ސައިފުﷲ ފައިސަލް، 19 އެވެ. އޭގެ ތެރެއިން ސައިފުﷲ ގެ ބަންދު ޖަހަން ފުރަތަމަ ފަހަރަށް ގެންދިއުމުން ވެސް ވަނީ ޝަރީއަތް ނިމެންދެން ބަންދުކުރަން އަމުރުކޮށްފަ އެވެ.
ރުސްތަމްގެ ބަންދަށް ކޯޓުން ދިނީ ތިން ދުވަހެވެ. އޭނާގެ ބަންދުގެ މުއްދަތު ހަމަވުމުން، ދެވަނަ ފަހަރަށް ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ވަނީ ތަހުގީގީ މަރުހަލާ އާއި ޝަރީއަތް ނިމެންދެން ބަންދުކޮށްފައި ކަމަށް ފުލުހުން ބުންޏެވެ.
ހުޅުމާލެ 1 ގެ ބޯގަންވިލާ މަގުގައި ހުންނަ ރެހެންދި ޓާފް ދަނޑު ކައިރީގައި މީހަކު މަޑުކޮށްގެން ހުއްޓާ، ސައިކަލެއްގައި ދިޔަ ދެ މީހަކު އޭނާ އަށް ހަމަލާދިނީ މިދިޔަ ހޮނިހިރު ދުވަހުގެ ރޭ 11:35 ހާއިރެވެ.
އެ މައްސަލާގައި ދެ މީހުން ހައްުޔަރުކުރީ ފިލަން މާލެ ދަނިކޮށް ހައިވޭއިންނެވެ. އެމީހުން ހައްޔަރުކުރި ސަރަހައްދުން މާރާމާރީ ހިންގަން ބޭނުންކުރާ ސާމާނު ވެސް ފެނުނެވެ. އޭގެ ތެރޭގައި ވަޅިއެއް ވެސް އޮތެވެ.
ފުލުހުން ބުނެފައިވާ ގޮތުގައި އެ މީހުން، މާރާމާރީ ހިންގީ ކޯރާޑިއެއް ބޭނުންކޮށް ކަމަށް މައުލޫމާތު ލިބެ އެވެ.